სახელწოდება „ა-Z” („ანი-Zet“) (ქართული ანბანის პირველი და ლათინური ანბანის ბოლო ასოები) ქართულ და ევროპულ კულტურათა ურთიერთკავშირს გულისხმობს.

სკოლა 2000 წელს ქართულ-გერმანული სკოლა „ა-Z-ის” სახელით დააფუძნეს გერმანისტმა, ფილოლოგიის მეცნიერებათა დოქტორმა მარინა ანდრონიკაშვილმა (დირექტორი) და ქიმიკოსმა, ქიმიის მეცნიერებათა დოქტორმა თამარ სარაჯიშვილმა.

„ანი-Zet“ მოიაზრება ევროპული ორიენტაციის ქართულ სკოლად საქართველოსა და ევროპულ ქვეყნებში არსებული ზოგადსაგანმანათლებლო პოლიტიკის, მიმდინარე სასკოლო რეფორმების – მოთხოვნებისა და მიზნების შესაბამისად მომზადებული სასწავლო – აღმზრდელობითი პროგრამებით.

დაარსების დღიდან კონტიგენტის ზრდის გამო, სკოლამ სამჯერ შეიცვალა მისამართი (2000წ. პეტრიაშვილის ქ. – 21-ე სკოლის შენობა; 2002წ. ფიზკულტურის ქ. – კერძო სახლი; 2004წ. – ფიზიკის ინსტიტუტის შენობა). 2011წელს კი სამ პარტნიორ სკოლასთან ერთად (მარი ბროსეს სახელობის ქართულ-ფრანგული სკოლა, სკოლები ,,სენტ-ეგზუპერი“ და „მოძღვარი“)  შეიძინა ზ. ფალიაშვილის ქ. 42-ში მდებარე ყოფილი 57-ე სკოლის შენობა და დააფუძნა „რობერ შუმანის სახელობის ევროპული სასწავლებელი“, რომელშიც საგანმანათლებლო პროგრამის სახით განაგრძო ფუნქციონირება. დამფუძნებელი სკოლები საგანმანათლებლო პროგრამების სახით ინარჩუნებენ თავის თვითმყოფადობას, ინდივიდუალობას, გადაწყვეტილების ერთპიროვნულობას, როგორც ევროპის გაერთიანებაში შემავალი ცალკეული ქვეყნები. ამ გაერთიანებით ქართულ საგანმანათლებლო სივრცეში პრაქტიკულად განხორციელდა რ. შუმანის მიერ 1950 წელს დეკლარირებული განახლებული ევროპის გაერთიანების პრინციპი – „ერთიანობა მრავალფეროვნებაში“.